The Varsitarian

HUMATAW ang mga Tomasino sa katatapos lamang na physician at occupational therapist (OT) licensure exams, samantalang pasok din ang iba sa Top 10 sa pagsusulit para sa mga nurse, physical therapist (PT) at nutritionist-dietetician.

Pinangunahan ni Chitra Punjabi ang 1,597 na mga bagong manggagamot matapos siyang magtala ng markang 89.42 porsiyento.

Pasok naman sa Top 10 sina Nikka Doreen Angbue-Te sa ikatlong puwesto (88.33 porsiyento), Michael Conrad Tongol sa ika-anim (87.83 porsiyento), Kristianne Emmanuelle Bagaoisan sa ikasiyam (87.50 porsiyento) at Rozelle Jade Javier sa ikasampu (87.42 porsiyento).

Nagtala muli ng 99 porsiyento na passing rate ang Unibersidad sa physician licensure exams katulad noong nakaraang taon. Pumasa ang 361 sa 365 na Tomasino na kumuha ng pagsusulit, kaya’t kinilala itong top-performing school.

Ang national passing rate ngayong taon ay bumaba sa 69 porsiyento, kumpara sa 71 porsiyento noong 2009.

Samantala, nanguna sa tatlong topnotchers sa OT licensure exam si Kim Gerald Medallon matapos magkamit ng markang 81.60.

Sumadsad naman ang passing rate ng OT ngayong taon sa 49 porsiyento, kumpara sa 70 porsiyento noong nakaraang taon. Sa 35 na kumuha ng pagsusulit, 17 lamang ang pumasa.

“Maraming dahilan kung bakit ganoon ang naging resulta. Ngayong taon, nagkaroon ng mga pagbabago sa miyembro ng board of examiners. Isa pa, mas kaunti rin ang kumuha ng board exams ngayon,” ani Jocelyn Agcaoili, dekana ng College of Rehabilitation Sciences, sa kanyang liham sa Varsitarian.

Bumaba sa 37 porsiyento ang national passing rate ng OT kumpara sa 55 porsiyento ng nakaraang taon. Pumasa ang 38 sa 103 na kumuha ng pagsusulit sa buong bansa.

Paliwanag ni Agcaoili, ang kahirapan ng OT exams ay maaaring ipalagay base sa resulta nito, kung saan malaki ang pagkalalayo ng pinakamatataas na passing rate sa hanay ng mga paaralan (97 porsiyento sa PT samantalang 74 porsiyento naman sa OT). Bukod pa rito, 88 porsiyento ang pinakamataas na markang nakuha ng topnotcher sa PT boards, samantalang 81 porsiyento lamang ang sa OT.

“From this, it may give the impression that the level of difficulty of the examination, particularly the OT application portion of the exam, would be much higher than the PT examination, assuming that the ability and aptitude of the PT and OT examinees would not be too dissimilar,” ani Agcaoili.

Kaisa-isang namang Tomasino si Louis-Albert Lee na nakapasok sa Top 10 ng PT licensure exam. Nakamit ni Lee ang ikapitong puwesto matapos niyang makuha ang 84.50 porsiyentong marka.

Kinilala bilang kaisa-isang top-performing school ang Unibersidad sa PT board exams matapos magkamit muli ng 97 porsiyentong passing rate.

Tumaas ang national passing rate ngayong taon sa 47 porsiyento mula sa national passing rate na 43 porsiyento noong 2009.

Pinangunahan naman nina Allyce Joana de Leon at Anna Vanessa Gan ang mga Tomasinong topnotchers sa nursing nang makamit nila ang markang 86 porsiyento.

Kasama rin sa top 10 sina Weena Marie Lim sa ikalimang puwesto (85.60 porsiyento), Jan Christian Feliciano sa ikapito (85.20 porsiyento), Kea Capio, Ana Francesca Centeno, Rouella Christina Fajardo, Renan James Lim, Laurence Lester Tan sa ikawalo (85 porsiyento), Elaine Katrina Cala at Julie Ann Clarin sa ikasiyam (84.80 porsiyento), at sina Edwin del Rosario II, Eunice Empeño at Micca Lagleva sa ikasampu (84.60 porsiyento).

Tumaas sa 99.34 porsiyento ang passing rate ng UST kumpara sa nakaraang taon na 99 porsiyento. Bumaba naman sa 40.01 porsiyento ang national passing rate kumpara sa nakaraang taon na 44 porsiyento matapos pumasa ang 37, 679 sa 91, 008 na kumuha ng pagsusulit.

Samantala, nakamit ni Rozel Ann Alcaide ang markang 85.40 sa ikaapat na puwesto sa nutritionist-dietitian licensure exam.

Umangat din ang national passing rate sa 70 porsiyento kumpara sa 67 porsiyento noong nakaraang taon. Charmaine M. Parado