The Varsitarian

NOON pa man, namamayagpag na ang UST sa larangan ng palakasan.

Bago pa man maitatag ang University Athletics Association of the Philippines (UAAP), kabilang ang UST, kasama ang University of the Philippines at National University, sa “Big Three League” noong unang bahagi ng dekada ’30. Mula taong 1931 hanggang 1934, hinirang ang UST Glowing Goldies (na ngayo’y Growling Tigers) na kampeon sa men’s basketball sa pangunguna ni Herminio Silva, noo’y miyembro ng RP Team na lumaban sa Far Eastern Games nang taong 1934 at naging tagasanay rin ng Goldies.

Sa kasikatan ng liga, isinilang ang UAAP noong 1938 kasama ang Far Eastern University bilang ika-apat nitong miyembro. FEU rin ang itinanghal na kampeon sa basketball sa pagbubukas ng UAAP.

Nang sumunod na taon, nakamit ng Glowing Goldies ang kanilang unang kampeonato. Sa isang hindi-inaasahang pangyayari, pinaghatian ng mga koponan ng UST, UP at FEU ang kampeonato sa UAAP men’s basketball matapos silang magtabla. read more »

MARAMI sa mga Pilipinong makatang nabuhay noong unang bahagi ng nakaraang siglo ang maingat na sumunod sa mga tradisyunal na tuntunin ng panulaan. Ngunit, isang Tomasinong makata ang natatangi dahil sa kaniyang pangunguna sa pagsalungat sa mga ito.  read more »

ALAM ba ninyong may hardin na tila isang naligaw na oasis sa loob ng UST?

Lingid sa kaalaman ng marami, matatagpuan sa tuktok ng silungan sa harap ng Main Building ang isang hardin na maihahalintulad sa isang munting paraiso.

Katatapos pa lamang ng digmaan nang pinasinayaan ang hardin noong 1947, 20 taon mula nang maitayo ang Main Bldg., upang magsilbing annex ng opisina ng Rektor. Kasabay nito ang paglalagay ng canopy sa gusali na silunagn habang papasok sa gusali. Ginagamit din ito sa iba’t ibang pagtitipon ng mga mataas na opisyal ng Unibersidad.  read more »

BILANG tagapagtaguyod ng kaunlaran at pagbabago, bahagi ng kultura at kasaysayan ng Unibersidad ang paglahok sa mga usapin hinggil sa makabagong teknolohiya. Isang magandang halimbawa nito ay ang pagsali ng pamantasan sa dalawang pambansang pagpupulong tungkol sa nuclear science.

Ginanap noong Pebrero 22-23, 1957 ang kauna-unahang Philippine Nuclear Science Conference sa Albertus Magnus Building. Pinangunahan ito ng Philippine Nuclear Research Conference and Training Committee, Philippine Physics Society at Civil Defense Administration (CDA). Tinalakay sa pagpupulong kung paano isusulong ng mga siyentista ang mapayapa at epektibong paggamit ng lakas-nukleyar sa Pilipinas.  read more »

MANINIWALA ka ba na minsang napabilang ang Unibersidad ng Santo Tomas sa listahan ng mga pamantasang mayroong pinakamababang pagtaas ng matrikula sa buong bansa?

Ayon sa survey na ginawa ng Manila Chronicle mula 1965-1972, halos kaunti lamang ang diprensya ng pagtaas ng matrikula sa UST na 23.8 porsyento kumpara sa matrikula ng Unibersidad ng Pilipinas, na tumaas ng 27.3 porsyento.

Naging basehan ng paghahambing ang matrikula at iba pang miscellaneous fees para sa 15-18 unit load kada semestre para sa degree ng Bachelor of Arts.  read more »

Tomasino Siya

mistulang ehemplo ng makabagong bayani si Fortunata V. Bautista-O’Santos sa pagtulong sa mga dukha at paglilingkod sa Simbahan, bukod sa mahabang panahong pagsisilbi sa Unibersidad.

Tubong Bocaue, Bulacan, nagsimula si Bautista bilang instructor sa College of Commerce. Naging pinuno siya ng kagawaran ng accounting at naging CPA review director matapos ang ilang taon. Bago siya nagretiro noong 1982, nanilbihan siya bilang assistant dean ng kolehiyo.  read more »

ALINSUNOD sa pagdiriwang ng Buwan ng Pamilyang Tomasino noong nakaraang Marso, ginugunita ng Unibersidad ang mga pamilyang ehemplo ng katapatan sa UST.

Isa na rito ang pamilya ni dating pangulong Manuel Luis Quezon. Bukod sa kanya, Tomasino rin ang lahat ng miyembro ng kanyang pamilya—mula asawa hanggang bunsong anak.

Noong Pebrero 24, 1894, nagtapos si Quezon Sr. ng Bachelor of Arts, summa cum laude, sa dating College of Philosophy and Letters. Makalipas ang isang taon, tinapos naman niya ang kanyang Bachelor of Laws degree sa Faculty of Civil Law.  read more »

KASABAY ng pagsailalim sa mga pagbabago nitong dekada 2000, matapang na nagsiwalat ang Varsitarian ng ilang mga kontrobersiyang ginulat hindi lamang ang buong Unibersidad kung hindi ang buong bansa. read more »

MATATAGPUAN sa kapilya sa loob ng UST Central Seminary ang isang hugis diyamanteng kuwadro ng imahen ni Hesukristo, ang Pantocrator. Nilikha ito ni Joe Barcena, isang dating katiwala ng seminaryo na pinag-aral ng mga Dominiko sa dating College of Architecture and Fine Arts.

Dahil sa utos at pagtitiwala ni Rektor P. Frederick Fermin, O.P., kinopya ni Barcena ang disenyo ng imahen ni Hesukristo mula sa isang maliit na bersyon nito. Kung susuriin, may pagkakahawig ito sa sining-Byzantine na kilala at madalas matagpuan sa mga simbahang Orthodox sa Europa.  read more »

BUKOD sa kauna-unahang cancer clinic sa buong Pilipinas, alam niyo bang matatagpuan din sa Unibersidad ang pinaka-unang hearing at speech center sa buong bansa?

Inilunsad noong taong 1978, naglalayon ang Hearing and Speech Center na gamutin ang mga pasyenteng may kapansanan sa pandinig at ang mga may-sakit na nahihirapang makapagsalita dahil sa pagkabingi. Naipatayo ang Hearing Center dahil sa pagpopondo ng UST Hospital (USTH). Ngunit bukod dito, malaki din ang naitulong ng isinagawang konsyertong pinamahalaan ni Dr. Eusebio Llamas, isang otologist o doktor na may espesyalidad sa pandinig, upang mapondohan ang pagpapatayo ng Center. Bilang pasasalamat sa mga nag-ambag para maitatag ang naturang Center, pinagpasyahan ng USTH na ialay ito para sa mga kapus-palad na pasyenteng may depekto sa pandinig.

Nakapaloob sa isang sound-proof-acoustics room ang Hearing Center na ginawa noon sa tulong ng Asian Calibration and Electronic Corporation. read more »

NAKARINIG na ba kayo ng paaralang hindi nagbibigay ng marka at walang bumabagsak?

Pinatunayan ng Tomasinong si Fr. Rogelio Alarcón, O.P. na hindi lamang sa tradisyonal na pagbibigay ng marka nasusukat ang kakayahan at talino ng isang mag-aaral nang ipakilala niya ang “sistemang non-grading” noong 1972.  read more »

IPINAGDIRIWANG ng Institute of Physical Education and Athletics (IPEA) ngayong Marso ang ikalawang taon nang pagkakatatag nito, sa pamamagitan ng pagdaraos ng kauna-unahang Linggo ng IPEA na ginanap mula Marso 4 hanggang 9.

Bilang pagkilala sa mga naiambag nito sa Unibersidad, sinubukang balikan ng Varsitarian ang maikling kasaysayan ng musmos na institusyon.

Ayon kay Prop. Rogelio Obusan, in-house editor ng Publishing House, higit na nabigyang halaga ang programang pampalakasan ng UST sa ilalim ng pamamahala ni Rektor P. Juan Labrador, O.P.  read more »

Tomasino Siya

KILALA ang Jollibee Foods Corporation bilang pinakamalaking fast food chain sa bansa. Malaki ang naging kontribusyon nito sa pag-angat ng food industry ng Pilipinas. Alam ba ninyong Tomasino ang may-ari ng kumpanyang ito?

Nagtapos si Tony Tan Caktiong sa Faculty of Engineering noong 1975 ng B.S. Chemical Engineering. Ayon sa Thomasian Engineer, opisyal na pahayagan ng pakultad, hindi gaanong aktibo si Caktiong sa kanyang pag-aaral at pagsali sa mga organisasyon.  read more »

Bago pa man inilabas ng Ministry ng Edukasyon at Kultura (Kagawaran ng Edukasyon ngayon) ang Kautusan Bilang 22, Serye 1978 na naglalayong ituro ang araling Filipino sa lahat ng kurso sa bansa, itinuturo na ang Filipino sa Unibersidad.

Nauna nang pinag-aaralan ng Faculty of Pharmacy, College of Nursing, at College of Education ang asignaturang Filipino bilang bahagi ng mga yunit sa pag-aaral.  read more »

SA LOOB ng halos apat na dantaon ng Unibersidad, tatlo ang wika na nagsilbing katuwang nito sa pagpapalaganap ng kaalaman sa iba’t ibang larangan.

Sa pagsakop ng Espanya sa Pilipinas, naging Español ang kauna-unahang wika na ginamit sa mga kurso sa UST. Dahil dito, nakamit ng Unibersidad ang titulong Royal University na iginawad ni Haring Charles III ng Espanya noong 1785. Ang wikang ito ay ginamit sa buong UST hanggang 1920.  read more »

MAIHAHAMBING ang tagumpay sa iba’t ibang klaseng tugtog. Mayroong mabagal na tila nakakaantok at mayroon din namang mabilis na para bang may kung anong hinahabol. Gayunpaman kung musika at tagumpay din lang ang pag-uusapan, tiyak na hindi magpapahuli si Ernesto Lejano.

Huling bahagi ng dekada ’50 nang magtapos sa Conservatory of Music ng Unibersidad si Lejano. Dahil sa kanyang angking galing, nabigyan siya ng pagkakataon na mapagyaman ang kanyang kaalaman sa ilalim ng pagtuturo ni Jose Cubiles ng Royal Conservatory, sa Madrid.  read more »

TINAGURIAN ang UST Central Library bilang isa sa mga pinaka-malaking silid-aklatan sa bansa. Subalit gaya ng isang umuusbong na halaman, nagmula rin ito sa isang munting binhi.

Bago sumapit ang dekada 80, isang bahagi lamang ng Main Bldg. ang aklatan. Kasama ng ilang mga tanggapan at kolehiyo, halos kalahati ng gusali ang nasasakupan nito.

Para sa pananaliksik at pag-aaral, dalawang silid na mayroong air-conditioning units ang nakalaan sa mga estudyante. Samantala, nahahati batay sa uri ng mga libro ang natitirang espasyo ng silid-aklatan  read more »

KILALA si Tomas Pinpin bilang “Prinsipe ng mga Pilipinong Manlilimbag” dahil sa naiambag nito sa pag-iimprenta ng aklat sa Pilipinas. At alam ba ninyo na ang isa sa mga makinaryang nagamit niya sa paglilimbag ay minsang ginamit rin ng Unibersidad?  read more »

THE SCHOOLYEAR is coming to an end, but schoolwork is far from over. In fact, the last few months are the busiest parts of the year. Examinations and other requirements come piling up all at the same time.

Facing these problems, students are caught between two things, being burnt out or still not knowing what to do. And yet, they have to survive the rest of this schoolyear’s challenges in order to claim a much deserved vacation.

Here are some tips to help students cope with the last ditch of heavy schoolwork.  read more »

DULOT ng taun-taong failure of elections sa Unibersidad, minsan nang isinulong ang pagbuwag sa Central Student Council ng UST.

Sa forum na “What went wrong… what should be done? Redefining the role of the CSC in the University” noong Hulyo 2000, iminungkahi ni Kathrina Rallanka, pangulo ng CSC noong 1999, ang “Oxford Model” sa pamumuno ng mga mag-aaral sa Unibersidad matapos ang sunud-sunod na failure of elections sa UST. Sa modelong ito, magtatalaga ang mga lokal na student council ng isang mataas na pamunuan na may mga kapangyarihang ehekutibo at lehislatibo. Sa pamamagitan daw nito ay magiging mas maayos umano ang representasyon ng mga estudyante sa UST. read more »

BILANG pangunahing paaralang-pangmedisina sa Pilipinas, naging bahagi ang Unibersidad sa mga naganap na pagbabago sa larangang ito. Kabilang na rito ang kauna-unahang open-heart surgery sa bansa.

Noong Abril 9, 1959, isinagawa ang isang open mitral commissurotomy sa UST Hospital (USTH). Pinangunahan ni Dr. Denton Cooley, isang siruhano mula sa Baylor University sa Estados Unidos, ang operasyon. Tinulungan naman siya ng isang pangkat ng mga doktor mula sa USTH sa pamumuno ni Dr. Benjamin Belmonte, isang cardiologist at propesor sa Faculty of Medicine and Surgery.  read more »

MAGKAIBANG larangan ang medisina at sining, pero nagawa ng Tomasinong si Dr. Antonino Raymundo na pag-ugnayin ang mga ito.

Mula pagkabata, nagpamalas siya ng angking galing sa sining. Subalit hindi nagtagal ang kanyang pagiging visual artist sapagkat kinailangan niyang kumuha ng kursong medisina.  read more »

MARAMING obispo ng iba’t ibang diocese at archdiocese ng Pilipinas ang nagmula sa UST. Sa kasalukuyan, 52 na aktibong miyembro ng CBCP ay pawang mga Tomasino. At bilang pagkilala sa kanila, matatagpuan ang kanilang mga larawan sa Bishop’s Gallery ng UST Central Seminary.  read more »

Noon Po Sa Amin

ALAM BA ninyong minsan nang binalak magpatayo ng bowling alley at billiard hall sa loob mismo ng Unibersidad?  read more »

SA KALAGITNAAN ng Vietnam War noong dekada ’60 hanggang ’70, may isang dayuhang hindi inintindi ang panganib upang tulungan ang mga mamamayan nito, si Sor Ma. Maylinda Enriquez.

Nasa kolehiyo pa lamang si Sor Maylinda at nag-aaral ng kursong Chemical Engineering sa Unibersidad, kinakitaan na siya ng kanyang mga kaibigan at kasama sa Epsilon Sigma Gamma Sorority ng kakaibang pagmamalasakit sa kanyang kapwa.  read more »

ISANG taon matapos itatag ang Reserve Officers Training Corps (ROTC) sa Pilipinas, itinatag sa Unibersidad ang ngayo’y 64 nang taong kapatiran ng mga Tomasinong kadeteng opisyal, ang Golden Cross and Sabers Fraternity.  read more »

ALAM ba ninyo na mayroong hostel sa USTe?

Ito ang Domus Mariae International Residence, isang dalawang palapag na gusaling matatagpuan sa pagitan ng Gymnasium at Publishing House at nasa pamamahala ng Treasurer’s Office.

Katulad ng isang dormitoryo, nagsisilbing bahay-panuluyan sa mga taong malalayo sa kanilang mga tahanan ang hostel. Mga kabataang estudyante ang madalas gumagamit nito.  read more »

KARAPATAN ng bawat mamamayan ang mabigyan ng sapat na edukasyon ngunit hindi lahat ay pinapalad at kasama na rito ang ating mga kababayang naninirahan sa malalayong kabundukan. Ngunit salamat sa teknolohiya, milya-milyang balakid ang nabigyang tulay ng Unibersidad upang maghatid ng edukasyon.

Sa pamamagitan ng “radio transceiver” at ng Distance Education Program ng Unibersidad, maaaring makapagsahimpapawid ng mga aralin ang mga Tomasinong guro upang maturuan ang mga mag-aaral na nakatira sa mga liblib at malalayong lugar. Matatagpuan ang radio transceiver sa radio room ng College of Education habang may mga radio transceiver unit din ang bawat lugar na pinagdadausan ng mga klase ng Distance Education Program.  read more »

UPANG mas mapalawak ang serbisyo-publiko ng Unibersidad sa larangan ng medisina, pinangunahan ng UST ang pagpapatayo at pagkakaroon ng School for Midwives sa bansa dahil sa kukulangan ng mga bihasang kumadrona noong ika-18 siglo.

Sa bisa ng utos mula sa España, inaprubahan ang pagpapatayo nito noong Pebrero 20, 1879 na sinang-ayunan naman ng Santo Papa matapos ang tatlong taon.  read more »

PINAHAHALAGAHAN ng Unibersidad ang mga katangi-tanging ambag ng sinuman, Pilipino man o dayuhan, sa anumang larangan sa pamamagitan ng paggagawad sa mga ito ng honorary degree o honoris causa.  read more »

SINO ang hindi hahanga kay Teodoro Valencia, ang Tomasinong kinilala bilang “Dekano ng Pamamahayag sa Pilipinas”? Bukod sa kanyang galing sa paggamit ng tri-media, naging mabuti rin siyang halimbawa sa pagtulong sa kapwa.  read more »

BILANG simbulo ng pagsisimula ng isang panibagong kabanata sa kasaysayan, isang tradisyon na ang paglalagay ng panulukang-bato o cornerstone bago itatag ang isang gusali. Isang angkop na halimbawa nito ang seremonya ng cornerstone laying noong 1911 na opisyal na naglunsad sa pagtatayo ng bagong kampus ng Unibersidad.

Pinangunahan ng matataas na opisyal ng Unibersidad, tulad nina Padre Jose Noval, O.P., ang rektor, at si P. Florencio Llanos, O.P., ang bise-rektor, ang seremonya na ginanap noong Disyembre ng taong iyon. Isinabay ito sa pagdiriwang ng ika-300 anibersaryo ng pagkakatatag ng Unibersidad.  read more »

HINDI lamang mahusay sumulat ang mga miyembro ng Varsitarian, magaling din silang umarte.

Napatunayan ito sa pagtanghal ng pahayagan ng isang dula noong dekada 70.

Gumanap ang ilang kasapi ng pahayagan sa Mina sa Lusak…Ginto sa Putik, isang presentasyong-kultural na itinanghal noong Setyembre 19 at 20, 1974 sa Education Auditorium.  read more »

SA MAHIGIT 50 taon ng Ramon Magsaysay Award, limang Tomasino na ang nakatanggap sa tinaguriang Nobel Prize ng Asya: sina Francisco Sionil Jose, Bienvenido Lumbera, Nick Joaquin, Eugenia Duran Apostol, at Washington SyCip.

Bilang pag-alala sa dating pangulo ng Pilipinas, iginagawad ang prestihiyosong parangal sa mga mamamayan na ginagamit ang kanilang talento para tugunan ang iba’t-ibang mga isyung may kinalaman sa pag-unlad ng lipunan.

Sa iba’t-ibang taon, pare-parehong nakuha nina Jose, Lumbera, Joaquin, at Apostol ang gantimpala para sa Journalism, Literature, and Creative Communication Arts, samantalang nakuha naman ni SyCip ang para sa International Understanding.

Sina Jose at Lumbera, parehong Pambansang Alagad ng Sining para sa Literatura at mga dating patnugot ng Varsitarian, ay nagkamit ng parangal noong 1980 at 1993 para sa kanilang mga natatanging kontribusyon sa larangan ng pagsulat. read more »

Sa Roma nakahimpil ang kataas-taasang pinuno ng Simbahang Katolika. Sa St. Peter’s Basilica at Square naman nakatayo ang mga rebulto ng mga santo at mga makasaysayang taong tumulong sa pagpapalaganap ng relihiyong Katoliko. Sa Pangunahing Gusali naman ng Unibersidad, nakatayo ang mga rebulto ng mga prominenteng tao ng ating mundo.

Kilala mo ba ang mga taong nakahimpil sa itaas ng Pangunahing Gusali?  read more »

MANINGNING ang pangalan ng mga Tomasinong nagtagumpay sa iba’t ibang larangan at nag-alay ng kanilang mga kaalaman sa lipunan. Isa sa kanila si Azucena Vera Perez, na nag-ukol ng kanyang panahon at galing sa paglilingkod para sa bayan.

Nagtapos ng B.S. Chemistry sa Unibersidad si Azucena noong 1941. Ngunit iba ang tinahak niyang landas nang lisanin niya ang kolehiyo. Mas pinili ni Azucena ang magsilbi sa publiko kaysa ipagpatuloy ang tinapos na kurso.  read more »

KINIKILALA ang Unibersidad ng Santo Tomas sa larangan ng medisina dahil sa mga doktor na nakapagtapos dito na kinilala hindi lamang sa Pilipinas kundi pati na rin sa ibang bansa. Sina Francisco Duque III, kasalukuyang Kalihim ng Kagawaran ng Kalusugan, Vicky Belo na sikat naman sa larangan ng cosmetic surgery, at Guillermo de Venecia, isa sa mga pinakaunang optalmologo na kilala sa pag-aaral at pananaliksik sa iba’t ibang mga vascular retinopathies, ay ilan lamang sa mga Tomasinong patuloy na nagbibigay serbisyo gamit ang angking galing at kaalaman sa medisina.

Noon pa ma’y napatunayan na ang kalidad ng edukasyon sa Faculty of Medicine and Surgery (FMS). Itinatag noong 1871, daan-daang mga doktor na ang hinubog ng institusyong ito at tunay namang nakapagbigay ng karangalan sa bansa nang dahil sa panggagamot. Isang magandang halimbawa nito si Gregorio Singian, na siyang nagtatag ng Philippine College of Surgeons noong 1936.  read more »

NOONG nakaraang taon, hinirang si Fr. Nereo Page Odchimar ng Mahal na Santo Papa bilang pinakabagong obispo ng Diyosesis ng Tandag, lalawigan ng Surigao del Sur.

Ipinanganak si Obispo Odchimar noong Oktubre 16, 1940 sa Bacuag, Surigao del Norte. Tinapos niya ang kursong Philosophy sa Sacred Heart Seminary, Palo, Leyte at Theology sa San Carlos Seminary, Makati. Naordenahan siya sa pagkapari noong Dec. 19, 1964.

Tomasino Siya  read more »

BAHAGI na ng pagtanggap sa mga bagong miyembro ng mga kapatiran ang initiation. Dito, kinakailangan lumikom ng lagda ng baguhang miyembro mula sa mga pinuno ng kapatiran sa pamamagitan ng maayos na pagsasagawa ng mga gawain tulad ng pagsayaw, pagkanta o pagkukunwaring baliw sa harap ng maraming tao.

Dulot nito at ng iba pang mga gawaing kahiya-hiya kaya naghain ng reklamo ang ilang estudyante ng Faculty of Arts and Letters sa noo’y dekana na si Ophelia Dimalanta. Isa ang Artlets sa mga kolehiyo kung saan nagsasagawa ng initiation ang mga organisasyong pang-estudyante.

‘Di naglaon ay naglabas ng memorandum order si Dimalanta na pumipigil sa mga pinuno ng mga kapatiran at organisasyon sa pagsasagwa ng hazing bilang bahagi ng pagtanggap ng mga bagong miyembro. Ipinatupad nito sa fakultad ang Pambansang Batas Blg. 8049 o ang “Anti-Hazing Law” na may layuning alisin ang mapaminsalang kaugalian. read more »

BAGO pa man ang kontrobersiyal na Nursing board exam leakage noong 2006, ginulantang na ang UST ng katulad na anomalya sa Physical Therapy (PT) licensure exam noong 1996, kung saan nagkaroon ng pagdududa sa ilang bahagi ng pagsusulit na umano’y pumabor sa UST.

Nag-ugat ang kontrobersiya nang lumabas ang mga paratang na may mga ibinebentang kopya ng mga tanong sa board exam sa halagang P7,000 pataas. Isang mag-aaral pa mula sa Fatima Medical Science Foundation ang nagsabing may isang Tomasinong nagbigay ng tips na lumabas naman sa eksamen.

Umigting ang mga akusasyon ng dayaan nang makuha ng UST ang una hanggang ika-90 puwesto sa ikatlong bahagi ng eksamen na PT Application. Animnapu sa mga ito’y nakakuha pa ng tamang sagot sa lahat ng katanungan. read more »

Noon Po Sa Amin

TAONG 1970, ilang araw bago ang kapaskuhan, nagkagulo ang UST dahil sa pagpapatalsik sa labindalawang manunulat ng Varsitarian.

Inilabas ng pahayagan ang Vuisitarian, ang lampoon issue ng Varsitarian, noong Oktubre 14, 1970. Subalit hindi ito nagustuhan ng administrasyon at sinabing puno ito ng mga hindi karapat-dapat na artikulo para sa isang konserbatibong pamantasan tulad ng UST.  read more »

LIKAS sa mga Tomasino ang pagiging masayahin tuwing Pasko. Bukod sa mga makukulay na parol at ilaw na nakapaligid sa Unibersidad, hindi batid ng karamihan ang masasaya at makukulay na Christmas issues ng Varsitarian noong dekada 30.

Panahon ng Commonwealth nang maisipang gawing kulay berde ang tintang ginagamit sa Varsitarian tuwing sasapit ang Pasko. Mula sa kulay itim, berde ang kulay ng mga titik at mga larawan sa buong pahayagan.  read more »

MULA aplikasyon sa UST entrance test, pagpapatala, paghahanap ng libro sa aklatan hanggang sa pagkuha ng grado, masasabing malaki na ang ipinagbago ng pamumuhay sa Unibersidad dahil sa paggamit ng Internet. Ngunit alam niyo ba kung paano ito nagsimulang gamitin sa UST?

Bago matapos ang taong 1993, ang Philippine Long Distance Telephone Co. (PLDT) ang nagsilbing sandigan ng koneksyon ng Internet sa buong bansa.

Bunga ng matagumpay na pagsusuri ng UST kasama ang Philippine Council for Advanced Science and Technology Research, University of the Philippines, Ateneo De Manila University, at De La Salle University, inilunsad ang paggamit ng Internet sa Unibersidad noong 1994 sa pangunguna ng UST Computer Center (USTCC) na kilala na bilang Santo Tomas e-Service Providers (STePS) ngayon. read more »

LAHAT ng pangunahing kalsada sa Maynila ay ipinangalan sa mga tao maliban sa España.

Pinanganalanang “España” ang kalsada sa harap ng UST bilang pagkilala sa bansang pinakamatagal na sumakop sa Pilipinas.

Ngunit bago ito naging España, ang kalsadang may habang dalawang kilometro ay bahagi ng Hacienda de Sulucan, isa sa sampung baryong noon ay bumubuo sa Sampaloc. Pagmamay-ari ito ni Doña Catalina de Guzman, biyuda ni Kapitan Juan de Cañedo, isang opisyal ng gobyerno ng España na nanirahan sa bansa. Enero ng taong 1694 nang ipagkaloob ni De Guzman ang hacienda sa mga madre ng Monasterio de Santa Clara. read more »

ALAM niyo bang muntik nang maging “University of the Philippines” ang UST noong 1870?

Noong 1870s, pinagbantaan ng mga rebolusyonaryong Filipino at mga Amerikano na buwagin ang UST dahil nasa ilalim ito ng mga Kastila.

Dahil ang UST na rin ang tumatayong departamento ng pampublikong edukasyon noon, napagkasunduan ng mga Dominikano at liberal na panatilihin na lang ang kasalukuyang pangalan nito, sa ilalim ng ilang kondisyon.  read more »

Tomasino siya

SA HALOS 40 taong pagsisilbi sa akademya, masasabing malaki ang impluwensiya ng Unibersidad kay Dr. Emmanuel Yap Angeles upang maitaas ang kalidad ng edukasyon sa Pampanga.

Hindi gaanong nakaririwasa ang buhay na ikinamulat ni Angeles sa piling ng kanyang pamilya. Tubong Pampanga ang mga ninuno nila at nakikitanim lang sa mga mayayamang may-ari ng lupa. Sa kabila ng kahirapan, pinapahalagahan ng kanyang pamilya ang pagkakaroon ng maayos na edukasyon.  read more »

KINIKILALA ang maraming Tomasino sa husay sa pagpipinta. Isa sa mga naging matagumpay sa larangang ito si Manuel Baldemor na nagtapos ng kursong BFA in Painting sa dating College of Architecture and Fine Arts noong 1968.

Habang nag-aaral, nagtrabaho siya bilang tagaguhit at tagapinta ng mga billboard ng pelikula na noon ay gawa lamang sa kamay. Mula sa di-gaanong nakakariwasang pamilya, tubong-Paete Laguna, natuto rin siya sa sining ng paglililok.  read more »

MAIHAHALINTULAD sa isang maliwanag na tala ang asul na krus sa tuktok ng Main Building. Patuloy nitong hinihikayat ang libu-libong mag-aaral upang linangin ang kanilang kakayahan at palalimin ang paniniwala.  read more »

MAGKAROON ng magandang produkto ng kosmetiko—ito ang pinaghirapang kamtan ng Tomasinong si Peñafrancia Prieto-Espiritu at naging daan upang magkaroon ng dekalibreng gamit na “gawang Filipino. “

Bilang pagkilala sa angking kagandhan ng Filipino, binuo ni Espiritu ang Philippine Societies of Cosmetic Scientists, nagkaroon ng sigla ang kosmetikong Pinoy. Nakatulong ito sa pagpasok ng mga dolyar sa Pilipinas at pagkilala sa mga medium-scale cosmetic industry.  read more »

ALAM BA ninyong hindi lamang UST Singers ang nagdala ng karalangan sa Unibersidad sa larangan ng musika?  read more »

KILALA ang Unibersidad ng Santo Tomas bilang tagapagtaguyod ng maraming sinaunang institusyon sa larangan ng edukasyon at komunikasyon. Isa sa mga ito ay ang paglunsad nito ng sarili nitong istasyon ng radyo,ang DZST na binansagang “The Voice of the Catholic Philippines (Ang Boses ng Katolikong Pilipinas),” ang pinaka unang Katolikong istasyon ng radyo sa Pilipinas.  read more »

NASAKSIHAN ng University of Santo Tomas Press, ang pinakamatandang palimbagan sa buong mundo sunod sa Cambridge University Press, ang mahigit na 400 taon na kasaysayan ng bansa mula sa pagsakop ng mga Kastila.

Hanggang sa kasalukuyan, hindi pa kailanman nagsara o naipasara ang UST Press maging noong 1941 nang sumiklab ang Ikalawang Digmaang Pandaigdig at noong 1972 nang ibinaba ni dating Pangulong Ferdinand Marcos ang Batas Militar.  read more »

SA KASALUKUYAN, umabot na sa 20 ang naitalang kaso ng Influenza A(H1N1) sa Unibersidad mula nang mabalita ang unang kaso noong Hunyo. Ngunit kung tutuusin, maliit pa ito kumpara sa bilang ng mga nabiktima ng Hepatitis A outbreak sa Unibersidad 12 taon na ang nakararaan.

Noong 1997, mahigit 500 estudyante at empleyado ng UST ang nabiktima ng Hepatitis A, isang sakit na nagdudulot ng pamamaga ng atay. Karaniwan itong nakukuha mula sa pagkain at inuming nakuntamina ng isang taong mayroong Hepatitis A.

Sa isinagawang imbestigasyon ng Bureau of Research and Laboratories sa ilalim ng Kagawaran ng Kalusugan, natuklasang anim na tanke ng tubig sa loob ng UST ang may mikrobyong coliform bacilli na siyang naging dahilan ng pagkakasakit ng mga estudyante. read more »

SA LOOB ng halos 400 taon, nanatiling matatag ang Unibersidad sa mga hamon ng panahon. Maraming trahedya na ang sumubok dito at kabilang sa mga iyon ang ilang naganap na sunog.

Matatandaan na noong Marso, nasunog ang Drivers’ Quarters ng Unibersidad na matatagpuan malapit sa Central Seminary. Noong 2004 naman, tinupok din ng apoy ang Faculty of Pharmacy Laboratory sa Botanical Garden na naging dahilan ng paglalaho ng ilang mga importanteng specimen.  read more »

KABILANG si Tomasinong Isabelo de los Reyes, historyador ng rebolusyon at tagapagtanggol ng mga manggagawang Pilipino, sa linya ng mga kilalang manunulat na sina Jose Rizal at Marcelo del Pilar na umukit ng pangalan sa kasaysayan ng bansa at nagbigay-daan sa kalayaan gamit ang pamamahayag.

Nakilala sa kanyang mga panunuligsa, binansagang “Ama ng Philippine Folklore” si Delos Reyes o “Don Belong” na nagtapos ng kursong abugasya at paleography sa UST.  read more »

KAHIT saang larangan, bumabandera ang galing ng mga Tomasino. Katunayan nito, isang grupo ng manggagamot ng UST Hospital nang isagawa nila ang kauna-unahang paggamit ng acupuncture bilang anesthesia sa Pilipinas.

Noong Agosto 11, 1972, matagumpay na nagamit ang acupuncture bilang anesthesia sa pagtatanggal ng thyroid ng isang ginang sa pangunguna ni Dr. Helen Paulino-Abundo, isang cardiologist at internist.  read more »

ANG University seal ang isa sa mga saksi sa mayamang kasaysayan ng Ust. Ngunit ilang ulit muna itong sinuri bago ito idineklarang opisyal.

Sa pinakaunang sagisag ng UST, makikita ang “tala ng katalinuhan,” samantalang isang anghel na sagisag ng Diyos ang nasa ilalim nito. Nakasandal ang nasabing anghel sa isang panangga na taglay ang krus na sagisag ni Santo Domingo. Sa tabi nito, makikita ang mga aklat na nagpapahiwatig sa mga larangang itinataguyod ng ust.  read more »

BIHIRANG mapagsama ang relihiyon at medisina. Dahil sa usapin ng pananampalataya at agham, laging magkasalungat sa mga bagay-bagay ang relihiyon at medisina. Gayunpaman, isang Tomasino ang nagawang pagbuklurin ang dalawang magkaibang pag-aaral—si Dr. Jose Ma. Delgado.

Bagaman malayo sa napiling karera, pinangunahan ni Delgado ang Philippine Lay Delegation sa 35th International Eucharistic Congress na ginanap sa Barcelona, Spain noong 1953. Hindi naglaon, itinalaga noong 1957 ng dating Pangulong Carlos Garcia si Delgado bilang Philippine Ambassador sa Vatican.  read more »

Tomasino siya

KILALA ba ninyo ang nagdisenyo ng iba’t ibang logo o coat of arms ng mga pakultad at kolehiyo sa UST?

Tahimik na naiangat ni Cenon M. Rivera ang sarili sa tagumpay. Dahil sa angking kagalingan, napasakamay niya ang halos 20 parangal sa loob at labas ng bansa.  read more »

MADALAS isipin ng karamihan na limitado sa isang larangan lamang ang pagkakamit ng tagumpay. Subalit ipinakita ni Basilio Valdes, Tomasinong doktor at heneral, na maaaring mahigitan pa ito sa pamamagitan ng dedikasyon at husay sa pagganap sa mga tungkulin.

Nakilala si Valdes sa kasaysayan bilang isa sa opisyal na humawak ng mga matataas na posisyon sa pamahalaang Komonwelt. Itinalaga siya ni Pangulong Manuel L. Quezon bilang chief of staff ng Philippine Army at ng Philippine Constabulary (kasalukuyang Philippine National Police) noong 1939. Naglingkod naman siya bilang kalihim ng Department of National Defense mula 1941 hanggang 1945, sa ilalim ng government-in-exile ni Quezon sa Estados Unidos. Sa ilalim ng kanyang pangangasiwa sa departamento isinagawa ang mga paghahanda ng hukbo ng Pilipinas sa noo’y napipintong digmaan sa pagitan ng Estados Unidos at ng bansang Hapon.  read more »

NAIPAKITA ng Tomasinong si Arturo Tolentino ang isang magandang mukha ng pulitika sa kaniyang pagsinaya ng mga batas para sa kasarinlan at kaayusan ng bansa.

Bilang isang mambabatas, nakapapaglathala si “Ka Turing” ng higit sa 2,000 batas, kabilang na ang anti-graft law, civil service law, at law establishing the archipelago doctrine for the Philippines. Higit pa siyang nakilala sa buong mundo dahil sa ipinanukala niyang Law of the Sea, na nakatulong sa pagpapalawak ng teritoryo hindi lamang ng Pilipinas kundi ng iba pang mga bansa gaya ng Indonesia at Canada.  read more »

BILANG pinakamatandang Katolikong unibersidad sa Asya, marami nang pinagdaanang anibersaryo ang Unibersidad ng Santo Tomas. Isa sa mga ito ay ang ikapitong gintong anibersaryo nito noong 1961.

Upang ipagdiwang ang ika-350 taon ng pagkakatatag nito, naglunsad ng mga aktibidad ang bawat kolehiyo at mga organisasyon sa loob ng Unibersidad sa pamumuno ng Central Board of Students at ng faculty club na may layuning maipalakalap ang impormasyon tungkol sa nasabing anibersaryo sa publiko.

Ayon kay Fr. Fidel Villaroel, O.P., ang dating punong archivist ng UST, bagama’t sinumulan ng Unibersidad ang paghahanda sa nasabing okasyon isang buwan bago ang mismong araw ng anibersaryo sa Abril, hindi ito naging kasing engrande ng paghahanda para sa ika-400 anibersaryo ng UST sa 2011 na nagsimula pa noong taong 2000.

Apat na araw sinuspendido ang pasok sa Unibersidad nang Marso, upang mabigyan ng pagkakataon ang mga estudyante at mga propesor makilahok sa paghahanda sa anibersaryo.

Isang misa ang ginanap na nagsilbing simula noong Marso 4 na ipinagdiwang ni Rev. Fr. Ciriaco Pedrosa, O.P., Bise-Rektor ng Unibersidad na dinaluhan ng mga estudyante, propesor at mga alumni at nagsilbing simula ng pagdiriwang.  read more »

BAGAMAN tila maliit na bahagi lamang ang pag-aaral ng Filipino sa kasalukuyang programang akademiko ng Unibersidad, minsan din itong nagsilbing pugad ng kasanayan, pagkilala at pag-unlad sa wikang pambansa.

Unang itinuro ang asignaturang Tagalog sa Unibersidad noong 1937, kung saan tatlo lamang ang mga Pilipinong naging mag-aaral nito. Nang sumunod na taon, tumaas ang bilang ng mga mag-aaral nito. Kinalaunan, itinuro na rin ang Tagalog sa College of Liberal Arts mula 1945 hanggang 1948.  read more »

ISA NANG malaking karangalan para sa karamihan ang makapagtapos ng kahit isang kurso sa kolehiyo. Subalit isang Tomasino ang namumukod-tangi dahil sa kaniyang pagtatapos ng 10 kurso mula sa Unibersidad.  read more »

HINDI nakukulong sa loob ng silid-aralan ang paggamit ng wikang Espanyol sa Unibersidad. Patunay dito ang pagkakatatag ng La Voz Estudiantil na nagsilbing daan upang magamit ng mga mag-aaral ang kanilang natutunan sa pag-aaral ng wikang Espanyol.

Nagmula ang Voz Estudiantil, ang dating opisyal na pahayagang mag-aaral ng UST sa wikang Espanyol, sa “El Universitario” na dating seksyong Espanyol ng Varsitarian.  read more »

Tomasino Siya

MAIPAGMAMALAKI natin na marami sa mga personalidad sa media ay Tomasino. Kabilang sa mga bantog at kilala sa larangang ito ay sina Arnold Clavio, Rina Jimenez-David, Eugenia Apostol, Julie Yap-Daza, at marami pang iba. Naging kilala sila hindi lang sa pagsulat kundi maging sa telebisyon at sa radyo.  read more »

HINDI BAGO ang pagkakaroon ng ROTC ng mga kababaihang estudyante sa kolehiyo. Minsan nang naipatupad ito sa kasaysayan ng Unibersidad.

Ika-15 ng Hulyo, 1985 nang maibalita ang pagpapatupad sa pagsasailalim ng mga babae sa programa ng ROTC. Magsasanay sila sa wastong pagmartsa, pagsaludo nang may tamang tindig at tamang pustura.  read more »

PINSALA ang iniwan ng Ikalawang Digmaang Pandaigdig sa bansa.

Bagaman mahirap ang kalagayan ng bansa nang panahong iyon, nagbukas ang Unibersidad hindi lang upang magbigay ng edukasyon kundi tulong sa mga nasalanta ng giyera sa pag-usbong ng UST Hospital.  read more »

SA LIKOD ng mga magagarang palamuti, libreng pagkain at ng makinang na fireworks display, ang taunang pagdiriwang ng Paskuhan sa UST ay nakaugat sa diwa ng pagbibigayan.

Taong 1993 nang simulang tawaging “Paskuhan” ang pagdiriwang ng mga Tomasino sa tuwing sasapit ang kapaskuhan. Noon, isang simpleng pagsasama-sama lamang ang naganap sa pangunguna ng noo’y UST treasurer na si P. Tereso Campillo, O.P.

Noong Disyembre 19, 1991 unang naganap ang ganoong klaseng pagsasalu-salo ng Thomasian community sa temang “Paskong Tomasino, Paskong Filipino ’91,” kung saan isang misa ang inialay sa UST Grandstand at isang paligsahan sa paggawa ng parol ang ginanap. Higit sa lahat, nagsilbing daan ang itinuturing na unang Paskuhan upang ipaabot ng mga Tomasino ang kanilang tulong sa mga nasalanta ng bagyong “Uring.”

Sa ilalim ng 14 na talampakan na Christmas tree sa Grandstand inilagay ng mga Tomasino ang mga regalong donasyon at tulong sa mga nasalanta. read more »

Kinikilala ang UST Museum of Arts and Sciences bilang isa sa may pinakamayamang koleksyon ng mga makasaysayang barya sa bansa. Sinasabing produkto ito ng matagalan at malawakang pananaliksik sa kasaysayan at iba?t ibang kultura.
Malaki ang naging kontribusyon ng mga Dominikong professor sa pangongolekta ng mga nasabing barya.
Sa kanilang pagnanais na mapangalagaan ang iba?t ibang kulturang kaakibat ng mga sibilisasyong sinasagisag ng mga baryang ito, kanilang pinamahalaan at pinaunlad ang koleksyong ito.  read more »

“Minsan, sa kakahanap ng tao sa pilak, hindi niya napapansin ang gintong nasa kanyang harapan” - Salawikaing Filipino

BAKIT hindi makuntento ang tao sa mga bagay na mayroon siya?

Ito ang tanong ko sa sarili. Mula pagkabata, pilit ko itong hinahanapan ng sagot, ngunit naging mailap sa akin ang sagot.  read more »

Noon Po Sa Amin

KUNG ngayon ay laganap ang balita tungkol sa kinakatakutang Severe Acute Respiratory Syndrome (SARS), anim na taon ang nakalipas nang nagimbal ang UST sa biglaang pagsugod ng maraming estudyante sa emergency room ng noo’y Santo Tomas University Hospital at sinasabing may Hepatitis A.  read more »

BILANG isa sa mga institusyong nangunguna sa larangan ng agham at teknolohiya, mapa-edukasyon man o praktikal na medisina, hindi nakagugulat na sa University of Santo Tomas Hospital (USTH) matatagpuan ang Benavides Cancer Institute (BCI), ang pinakaunang institusyon sa bansa na naglalaman ng lahat ng mga makabagong kagamitan at pasilidad na kinakailangan upang masuri at mapagaling ang isang maysakit na kanser.  read more »

Alam ba ninyong minsan nang may nagtangkang tumalon mula sa itaas ng Main Bldg? Salamat na lamang sa kabayanihan ng Tomasinong si Ernesto Isidoro at napigilan ang malagim na trahedya.

Umaga ng Marso 25, 1972 nang bulabugin ang Unibersidad sa sumubok pagpapatiwakal ng isang ginang mula sa ikaapat na palapag ng Main Bldg. Hindi namalayan ng mga security guard ang pag-akyat ni Imelda Marquez, 29, secretarial graduate ng UST, sa tapat ng rebulto ni San Agustin na nasa ikaapat na palapag.  read more »